الشاعر كاظم اسماعيل كاطع ...موسوعة دواوين . كل ما يخص الشاعر الكبير كاظم اسماعيل كاطع

الإهداءات
  • غزل من قلب الغزل:
    ١٩ رمضان | - ياطبرة هزت أرڪــان الوجود أيقتل ولي الـلـه في حال السجود !🥀💔
  • غزل من من قلب الغزل ..:
    ضياءٌ شعَّ من أرض المدينة و زُفَّت البشرى لرسول الله (ص) بولادة سبطه الأول الإمام المجتبى (ع).✨💚
  • غزل من قلب الغزل:
    "يارب دائمًا اعطنّي على قد نيتي وسخر لي الأشخاص اللي يشبهون قلبي🌿✨. .
  • غزل من قلب الغزل:
    مارس الرحمة قدر المُستطاع فكلما تلطفت مع خلق الله زاد الله لطفهُ حولك.💐
  • غزل من قلب الغزل:
    اللهم إنك عفوٌ كريمٌ تحب العفو فاعفو عنا ♥️😌
تمنيتچ مثل ماريد ضني وزاعلت ضني
تمنيتچ هدم بالروح ويحير البچي يبني
شفتچ ياحمامة محجلة بجرحين
بالدم ريش متحني
ومنو يسمع غنه الخرسان
منو يدري بگلبهم شايب يغني
تمنيتچ مثل ضهري
جسر محني
جسر ينگطع بيه يذبني فوگ الماي
والمي يبتعد عني
واطيح بگاع لا گاعج ولا گاعي
ولا بيها أثر منچ
ولا بيها أثر مني
تمنيتچ گبل هل حين
بس شلفايدة وشارب طلع لبني
تمنيتچ مغارة كيف بيها انزع جلد حزني
ومن بعدچ واتوب الروح
جانت كاولية أوين مايردونها تغني
 
باجر عيد
باجر عيد..باجر تِعْرض عيونج يحلوة والعذاب يزيد
باجر كل ولف يشتم عطر ولفه وتطبع حنته إعله الإيد
باجر والحزن يلكَاني واتلكَاه..يلبسني والبسه إجديد
ويا محلة الحزن بالعيد
وانتي بعيدة كلش..والقريب بعيد
وآني وحيد..أصفكَ إيد..أنشف بإيد
دمعات العذاب مطركَه بجفني وتصب شما يمرن عيد
باجر والحزن بيا يشكَ إشطوط ميهن وي دمعي يزيد
يلي إتعودت ملكَاك ماكو اصعب من التعويد
أخذ عمري ولاكفاه..
خذاج انتي ولاكفاه..
بعد من عندي جا شيريد ؟؟
باجر من وكت يصحى الفجر ويغرد التغريد
وآني وحيد..
مثل غراب لاوي الجيد..
يل رحتي بدون اوداع..بعدج والحياه متفيد
هنيالي اذا بالموت
بلكي انصادفج ونلوح إيد بإيد
يل صرتي بعيدة هواي عن عيني
عن الكَلب موش بعيد
إلج دكَات كَلبي تزيد..وابد مايوم مره تهيد
راح أصليلج صلاة العيد..وانتي الوحدج تنامين
ومخليه وراج الناس..ومخليه حبيب وحيد
باجر عيد .. باجر عيد
باجر والحزن يلكَاني وتلكَاه
ويامحلى الحزن بالعيد
وانتي بعيدة وآني بعيد !!

الگاطع
 
ولا چنك يگلبي بگلبك النار
ولا چنك ثلج من عاشرت نار
خلص عمر المواسم والنياسين
وظل بس الغنه الصامت والاسرار
نام وصبح الناعور مشلول
لا ماي النهر يصعد للشفاف،،
ولا بيه حيل يكَدر حيل .. يندار
چان الفرح عدنا طير محبوس
ولكَــــه فرصه وتعلگَ بالسما وطار
ولا چنك يگَلبي فوگ الارماح
معلگَ... خلصت عمرك بالاسفار
ومادامك يگلبي فوگ الارماح
و لاعندك حبيبه و لا الك دار
شيفيدك لو تجر كل المواويل
شيفيدك لو تردد كل الاشعار
شيفيد ..تمر نهر بولايه مهجوره
شيفيد ...تمر محابس بيد مبتوره
شيفيدك يا.. يول يا كافي ... يا كَلبي
تظل مثل الارض يوميه إلك ...دوره
وشمتانيه الروح وبعدها متانيه ...؟
واسنين تكَضي من العمر كل ثانيه
واحلام ياخذها الدمع كل مشوار
وبيوت ياخذها المطر كل مشوار
وانت ...؟ انته يكَلبي تعيش للحين
ولا چنك ثلج ومعاشر النار"
انه وياك خلينا غريبين
سولتنا الجگاير... والصبر زين
وبليل الشته يصير الحزن حار
،،دافي ياحزن للفارگ اثنين،،
صاحبته وشبابه انكتلوا ازغار
آنا وياك خلينا غريبين
نحلم بالحبيبه .. وعتبة الدار
وإذا شفتك يكَلبي بيوم فرحان
هذا اول عتاب وآخر إنذار

''كاظم اسماعيل الكاطع''
 
كاظم اسماعيل الكَاطع

وكيفت....

طكَن ايامي ،وخضرن وركَات بعروكَ السنين

أوكلت نشت الماي بيدي...

ولن كَطعت الخيط بيه..ولو لحت كَلبي الحزين

طلع رمليه ودادك يالحسبتك خوش طين!!!

وخضرت بس شوج يالكَلبك جزيره..

ورحي شوكَ امدلهمه وتمطر حنين

فزعت عيون الليالي ...

ولن سوالفنه حلم!!مر اعله عين النايمين..

وذاك انه..

وجرحي اعله حاله!!

اينام ويندهه الونين..

وتالي يالمالك رفيج..

اتهدمت اسنيني

وطحت بجفاك..

وفراكَك غميج

لاجرف ونساك بيه..

او لا على غيرك يوديني الطريج.؟!

او لا هذا انته الوفي..

ابكَلبك نداوة شوكَ وطلع غريج..

وجنت اظن الماي كَيش..

وحسبيت الماي كَيش..

وجِانت اسنيني حمامه !!

ولن هواك اغراب يفرسها ابسمة الهجران

وينزلها ريش!!؟

وجنت دم اليجري بيه..

ورحت مني..

ابغير دم اشلون اعيش ؟!

تايه ودولابي يفتر..

امشي بالحسبه وضيع..

وأصبر ابلا صبرــوأذبل ــشجره ما مر بيه ربيع

وهم الف ياريت أمل ومثل ما بعتوني ابيع..

هونك ..

تهده أويه كَلبي..وبسك اتمرجح..

تره خويطه رفيع

حمليته اهواي..فوكَ امحبته. وحمل الونين

وانته ..

وفراكَك مناجل تشلع اعروكَ السنين

طلع رمليه ودادك يالحسبيتك خوش طين

يالحسبيتك خوش طين
 
........الرحيل.........



ـــــ((كاظم اسماعيل الكَاطع))ـــــ

مالي خلكَ الطيف

لو بسط على جفوني بعذابي

ومالي حيل ايلاوي الوحشه من اغني

وآنــــــــه

لو تسمع رنين اغناي تنسل الربابه

ما فرحت "ابنايلك" ساعة وصل

وسنين بجِتني "العتابه"

وما جرعت اموادعك

وموادعك علكَم شرابه

من قفلت الباب روحي اتبسمرت!!

ووداعتك بجِت اخشابه

وتدري

عاشكَ من يدكَ باب الولف

ينهضم لو محد يرد للدكَ جوابه

وتدري

ابحال الكَلب

كون الخذاه طول غيابه

يا عذابه

وآني ما عندي كَلب يجرع ونين الشوكَ

من يذكر احبابه

لا تذل روحي بودادك

واليذله الشوكَ اظن محد يهابه

لا تخليني ابدرب فركَاك

مثل التايه ابليلة مطر

والعرف سد ابوجهه بابه

يلتهي ابظيم الدرب ؟!

لو يلتهي ايضمد اصوابه

يالنويت اتشيل!!

من هسه العمر حسب احسابه

لو وراك ايشيل ويذبل شبابه

لو يظل بجِفوف شماته لعابه

او لو صدكَ وتشيل!!

شيلة اجنازة العشره الطويله

اواسي كَلب متيمك وابجِي المصابه

لجِن كَلي شلون !!؟

لو عن الهوه

ومريت ، ولكَه البيت يتناثر اترابه ؟

من قفلت الباب..

روحي اتبسمرت..

وبنارهه التهبت اخشابه

لا تخليني بليالي اجفاك اغني

وآني لو تسمع ونين اغناي تنسل الرابه
 
كف يجف افراكَهم...كف لا تعتني

كفني من جِنه وجِنت..

ويام ناسيها ونستني..

لا تكحلني بصورهم..

وك مراودهم عمتني..

وعيني..؟!

عيني لوحه مشركه..

بالك تدكَ وتبسمر الطيف اعله جفني..

وانه ما عايز حزن..

عاين..!! بعدني بثوب حزني..

كفني..باعوني رخيص او غيرهم وادم شرتني..

رخصوني..

ضيعوني..

جِنت ليره اعله الدرب وعيونهم ما وجدتني!!

جِنت ليره..اتلوح اعله اصدورهم..

لاجِن كلايدهم شبه...وما والمتني..

كف يجف افراكَهم ...عين العشت بيه انكرتني

كَربوني...

ذبو الشص ونتل كَلبي الجرفهم والسوالف دللتني

سمجِه خطار اعتنت

واعله_ الزهر_ شصهم عزمني

ذبلوني

وجفلو من عيني حتى النوم...

طار وما خفكَ جنحه اعله جفني

يوم الموادع نسوني...

وحته روحي المشت وياهم نست ما ودعتني!!

لا ترد بيه الدربهم...

جيت منه اوحيد بس دمعي يزتني..

جيت من درب العشكَ مكسور خاطر

سحكَو اسنين المودة..

ومشو اكَليبي الوفي ابسجِة خناجر

لبسو دنياي غيم..

او فورو اعليه الحزن داير مداير

كون اشكَ كَلبي واشوفك؟!

جِا كَلت عفيه اعليك اشلون صابر؟!

جِنت شمعه اضويلهم لاجِن عواصفهم طفتني

وجِنت ليره اعله الدرب وعيونهم ما وجِدتني

وعيونهم ما وجِدتني..!!

كاضم اسماعيل الكاطع
 
كلهن سولفتهن لو بعد منهن
شد عيني بعصابه
واخذني مغمض اندلهن
واندل وين مضمومات
واعرف ليش دافنهن
مثل شايب خلص عمره
وبقه بعود الصبه يدندن
انه كلما الوذ بهالتقيه واضحك اويه الناس
دمعاتي علي تفتن
شفت قصر الاماره ويم عبيد الله
تلاگه المستحيل اهناك والممكن
الجسد عالگاع....والراس بطشت... والجامع يأذن
...
وصدى ذيچ الشتايم من حرب صفين
من فوگ المنابر وأذني تسمعهن
ومن طعنة علي ويه الفجر بالمحراب
شكوا نجمات دمّن باللطم خدهن
ودخان المخيم بعد جواه نار
ومن طبع الجروح التعتگ تخزن
...
كل ما نسأل التاريخ... ياهو اليستحي منهن
يدفن راسه بچفوفه
يكول هواي بچّني وسجلهن ضاع
ومضيّع دفاترهن
عدا ذيچ الاجساد الطاهره الظلت ثلث تيام
ومن ذاك النزف
صار التراب بكربلاء ليّن
...
عدا چفوف الگمر عباس
ما ذب رايته واچفوف اديه ذبهن
عدا سوط الشمر حرّك ثنايا حسين
مدري شجاوبنه وبالعجل مدهن
عدا عيون الفواطم من مشت للشام
عين اعله التراب ...
وعين تربي الجسد والدهن
...
عدا السجاد فوگ النوگ
واديه من السلاسل ظل ينّث دمهن
ومعرسين والزفهم طلع جناز
ومعرسات والحنه بعدهي بطرف اصابعهن
واگبور النجف ... والغرّبوا بالليل
والگصّن گصايبهن
ونعوش الاطفال التنحمل ... مو فوگ سيارات
چن رب السمه .... ببساط شايلهن
..
عدا اطلوگ الحوامل بالشته ... بالواحد وتسعين
گبل ايّامهن والقصف جيّبهن
كل ما نسأل التاريخ
ياهو التستحي منهن؟
يگول هواي بچّني وبچه وياي الانس والجن
هدوم حسين لسه مبللات بدم
على حبال الشمس بيده النبي شرهن

الكبير كاضم سماعيل الكاطع
 
اجه طيفك
غريب امتيه دروبه
اجه
ولاعين التلفيه
ولافرشت جفنها .. الجيته محبوبة
اجه طيفك
يدك بيبان
ياجفن اليدك
امقفله بوبة
اجه يعاتب ... نشيد اهله .. ولگه الدلة ابمضيف الحسرة مصلوبة
شاف الناس تشرب بالجماجم ماي!
صاح شمال هاي الناس؟ وشماله شهر عاشور مامش ماي بحبوبه؟
ظل عطشان
يترجه يكت الغيم .. عاين فوگ .. لكة الغيم يترجة انگاط حالوبه
واستغرب نشد روحه ولك ياروح
شو حس الفشگ مبحوح
شو حگنه مسيح انسمر ويه اللوح
شو غرگت سفينة نوح
شو كف البحر ماحنته دوبه
ولامذنب لزم شباك گلبه وكفر ذنوبه
ولا للطيف من نباگ من عين الزلم حوبه
وصرخ
لايامذلة سندباد العرب لويدري العرب تغرگ
ولاراد الملاحه
ياهظيمة جبل طارق
لو بچه اعله احفاد طارق
لو صفگ راحه اعله راحه
يالغز بومة تلاوت وي نسر كسرت جناحه
يازلمنه الليل طول
ليل يمته الثار يكرمنه بصباحه
يلحچيكم بنادق
والبنادق هلوكت تحچي بفصاحة

الكبير جدا كاضم اسماعيل الكاطع
 
ياعلي طول مسيري
وفارت بروحي الرمال
وحملت نوگ العشيرة
وهودجي براسه سؤال
راح أدوس ارض الخراب
وصحره مـا بيها دليل
وراس ما بيها اتجاه
وبوصله
امتيهه اليمين من الشمال
تعبت النوگ أاشأجاها
مايگدرن عالثگال
ناگه بالروح اعگرتها
محمله وهودجها مال
ناگه بالصحره بعتها
بمسطر أهل الباديه بسوگ الجمال
وثالثة بگصبه اذبحتها
ماتصح سچين عد ولد الحلال
وهل بگيت امشي اعلا جدمي
وشايل بظهري الصناديگ الثگال
بالجزيرة الدمعة تچوي
حارّة أخدود الرمال
ليل وذياب الجزيرة
صوتهن يشده البال
أمنت شفت المناير
من بعيد تصيح للتايه ټــعال
فك سراگي ضلوع گلبي
وشرد منهن أرنب أبين التلال
ردت افك جرح العتب واطلع متاعي
ليش صار البشر ساحه
بيها رعيان وحلال
اربط الغترة بضريحك
ردت أذب اعگالي واصرخ
طاح راسي وياالعگال
ياعلي من أوصل ضريحك
اوگف مفرع واصيحن
ياعلي الميزان مال
گام اله والريح مغضب
نقصد وزيد وشال
غرگت بنص البحر
والدفة غرگت والشراع البيها مال
مشت عني واتركتني بهالجزيرة
بس تلال
مدري ياهو البلسفينة
صاح للشاطي ټــ؏ـآلـِ
ياعلي ذبحوا حسينك
ابنه ... وابنه ... ودمه سال
ياعلي والحلوة ماتت
ولا يزال الدم يجري
يجري في كل الرمال
ياعلي وحبك سفينة
هادية اتريح البال
ياعلي وتاخذني ليها
هيه يم گاعك رهينه
وهذا عندك مو محال.

الكبير كاضم سماعيل الكاطع
 

أقسام الرافدين

عودة
أعلى أسفل