ابوذيات اهلنا مقتبس شعراء البصرة مجموعة كاملة اجمل ابوذيات لشعراء

الإهداءات
  • غزل من من قلب الغزل ..:
    ضياءٌ شعَّ من أرض المدينة و زُفَّت البشرى لرسول الله (ص) بولادة سبطه الأول الإمام المجتبى (ع).✨💚
  • غزل من قلب الغزل:
    "يارب دائمًا اعطنّي على قد نيتي وسخر لي الأشخاص اللي يشبهون قلبي🌿✨. .
  • غزل من قلب الغزل:
    مارس الرحمة قدر المُستطاع فكلما تلطفت مع خلق الله زاد الله لطفهُ حولك.💐
  • غزل من قلب الغزل:
    اللهم إنك عفوٌ كريمٌ تحب العفو فاعفو عنا ♥️😌
يگلبي بيش اخيطنك ولحماك
ولا واحد شگف عنك ولاحماك
يجيك الضيم من دمك ولحمك
من اقاطعهم تلوم الناس بيه
عبد الواحد الهلالي

اشد الها تگلي الدهر واطاك
غرفلك هالكريم بحسن واطاك
لون ايدي تشل عليك والطك
اعلمك ما جره منك عليه

من مثلي تعذب من تمرمر
اشتحمل الدك يگلبي من تمرمر
تخطف گلوب بيدك من تمرمر
طريجك سلطة الباري عليه

تهزهز يا لحد وانفض ترابيك
وعزيز الروح هالنايم ترابيك
يباچر عيد وعيوني ترابيك
دضل بنومتك والنوح اليه
هاشم فليح – شطره

بس انه زماني وياي خوان
خلاني وحيد بغير خوان
وانتچلت على الصديق وطلع خوان
يحاول يسلب اهدوم العليه

ذلولي ما يجد للسير ضلعاي
انتحوا عني ومد البصر ضلعاي
شبه كسر الزجاج انكسر ضلعاي
بعد ما يرهم التجبير بيه

صوتي من نداي عليك ينباح
وسرنه لا تضن للغير ينباح
اتوده ليش يطلع چلب ينباح
تحذر لا يغدرك بالثنيه

احبابي شلون حالتكم بعدنه
اشبيدنه والوكت عنكم بعدنه
اچان انتم سلييتونه بعدنه
بذكركم كل صباح وكل مسيه

دليلي انزرف من الاه وانسه
شمشله يعرض ويه الخيط وانسه
يگلبي جوز عن اهواك وانسه
اشلون انسه وتصاويره بديه

عشرتك خوش للصاحب ويازت
الزواني لا تدك دكتك ويازت
فلانه من الخزي عفت ويازت
وتزيد انت عليهه القاط ميه

يحادي الضعن وين تريد ولميت
واخاف العزيز وياك ولميت
اچان اتريد وتولمت ولميت
بعد ماضل الك كل حك عليه

تجي بطروشنا طروشك حيينا
عزيز ومن تجي لينا حيينا
تموت انموت ومن تحيا حيينا
تصحا اصحا تمرض مرض بيه

حرت لا وين وجهي ووين مگفاي
على الخله دموع العين مگفاي
يگلبي لو احط الترف مگفاي
للمعشر ولا يصعب عليه

مسحت الدمع باليمنه ووحنت
ذكرته وضجت ضلوعي وحنت
الناگه تعلمت مني وحنت
مثل گلبي گلبهه انصدع هيه

شحم چلاي ذوبته من الحاي
وغدت سوده مراكبهه من الحاي
اجيت اتبع صفاينهم من الحاي
غدت شمس الضحى ظلمه عليه

المحبه ركزت بيه وعامات
وسهم الچبدتي تصابه وعامات
الي خالات خل يبچن وعمات
وعلي لاتطب تبچي الاجنبيه

لا عن طمع خاويتك وانه خواك
اطيحن باول صياحك ونخواك
ان چان انت خوي ليه انه خواك
ردتك للصدگ وانكتت بيه

الدنيا وياي زعلانه وانه الها
تبالي الدوم راعيهه وانه الها
وحگ سادة بني هاشم وانه الها
مگولن اخ لو تنجلب بيه

حلو لا مستوي حبي ولا ني
ولا عود اليسليني ولا ناي
العگد ضيج مفر مالي ولاني
دعلج ونفض ريشه عليه

ترف طولچ يعود الموز وانتي
ويشوكج بات بالدلال ونتي
يحكلي وياج اكظي العمر وانتي
جسم واحد وروح البيج بيه

وين اللي يصدر العيس لاميت
انشظى عگلي وعلي الناس لاميت
اريد اصبر واشوف الصبر لاميت
الصبر اثر اخزانه وعمل بيه

عيوني من سبب فرگاك حايات
مغذيني هواك اسموم حايات
اموت ولا اطلب من النذل حايات
علي بيت المرد عيني جويه

غريبه امها يصاحب وابهمنا
شعاع البدر خدها وابهمنا
انا ماريد عشره وابهمنا
عشرتك بالدقايق تمت بيه

حبيبي التين والزيتون وازهى
وشبه شجرة ربيع السنه وازههى
حضرها الواشي والنمام وزها
خله ابكل طويله نار السريه
عيدان

روحي والهوى ودنياي واعداي
لامتني جميع الناس وعداي
اريد اصبر واشوف شلون وعداي
واشوف العاقبه شصير بيه
عيدان

اعيونه گبل اشافه شتمني
ويعگلي الچان ثابت شتمني
انهجم بيتچ يروحي شتمني
تمنين الذي يصعب عليه

وين اللي يميز الحجي يزنه
نححجي زين يطلع شين يزنه
السله تريد ومن العنب يزنه
يصير اثنينهن يرحن عليه

عليك البس هدوم الحزن واحد
عزيز انت يهالنايم واليعز واحد
الناس تمشي وتودع نعش واحد
وانه ودعت خمسه وماردوا اليه
سامر

يوصفون العوارف شجر من شاف
على اطرافه يموج السيل منشاف
اكلنا التمر والغصن منشاف
ميت لا شاف شمس ولا وطيه
حسين الغالي

الدجى چلچل على جسمي وجله
انكشف رحل الصبا وجه وجله
عزت قدرة الباري وجله
خلق بلقيس وولفي سويه
حسين الغالي

وحك من صور الحاجب والعيون
لاجلك لاسكن البيده والعيون
وخزن جرح دلالي والعيون
يهلن كل صباح وكل مسيه

وحگ شفتين محبوبي وسنه
وعلى حالي بچت شيعه وسنه
لجر سيف الهجر لجلك وسنه
واحارب كل عدو يعاديك اليه

اريد اصبر وشوف اشلون وعداي
طحت بمرض مرض ايوب وعداي
اخبرك يا حبيبي گرب وعداي
البگه براسك هواك العم عليه

حسن يبني تلگه الضيف حي بيه
وعسى زاد الغديد سموم حي بيه
ياهو الجمع ماله وراح حي بيه
سعيد الحفظ عرضه من الرديه

اخوتك لا تعاديهم ومرهم
وطيع الكل ارادتهم ومرهم
همه الدوه لجروحك ومرهم
همه حزام ظهرك بالدنيه

سره ضعن الاوده بليل ياشال
ويرد سباح گلبي يرد ياشال
شوگع منه حبيبي وصاح ياشال
والنعم منه فلا تحصل رديه

وحك اللي وگفله الطير واحماه
ومن نحره يفوح المسچ واحماه
شفت حي دخل عالميت واحماه
كتل ربه ولا منه خطيه

وحگ اللي طعم للطير وذره
ومن نحره يفوح المسج وذره
شفت حي دخل عالميت وذره
كتل ربه ولا منه خطيه

لابد ما الك عالدار مرات
واخبرك بالليالي شكثر مرات
مو مره خنت وياي مرات
وعندك امل تعود اليه


اخوتي الچنت اودهم دوم يمناي
عگبهم ما تهوش اعداي يمناي
گمت اصفج يساري فوك يمناي
على ابن امي السره تحت الوطيه

غذاي الصبر والحنظل لهاماي
تشب النار من جدمي لهاماي
وين اليمله الجربه لها ماي
يطفي النار البگلبي السريه

همت بالبر يسار امشي ويامن
وراح المفرح كليبي ويامن
ويباجي العمر وين اگظي ويامن
گظيته بذل يلاهي التفت ليه

وحك راس النبي والحسن والحاج
وعلي نكبات دهري رواف والحاج
يشامت گوم شب نارك والحاج
وخلي شما يصير يصير بيه

علي دگي يوالدتي وناحي
ذبل عودي الچان يزهي وناحي
لا تفرح يهالشامت وناحي
افرح لو سره الجناز بيه

الدهر طگني بهامه ولاخر
صب دمع عيني ولاخر
صرت مثل العبرت واحد ولاخر
حالت بينهه وبينه المنيه

اشير على الرجال وعلي منشار
وضلعي ما يگصه اثنعش منشار
وين اطير وين تحط شركي عليك منشار
الزمك لو الك جنحان ميه

من سابگ تخالف شور منشار
واحنه اللي نگص بالجدم منشار
الحر مايلزمه الشرك منشار
يطير ولو حوه الجنحان ميه

يعت بيه الدهر مرات وانعيت
وعلى ضعون الجفتنه صحت وانعيت
يهل الطير البچيت الربع وانعيت
نعاك اللي نعاني اعلى الوطيه

انه الگايم لعد گومي ونخواي
وبيهم ما نفع صوتي ونخواي
الناس تلوذ باخوتهه وانه خواي
اگطعوا ما گطعت الشمات بيه

شربت التتن وانشبلي سعالاي
مريض ومحد امن اهلي سعالاي
نخيت امن الله والعباس سعالاي
زرگ رمحه ومرگ طيبه عليه

خذت عگلي يداحس واسره بيها
لذبهه بنار هجرك واسره بيها
شبه ست الزبيده واسره بيها
اغلطت ثاريها ليله العامريه

جرح گلبي يلاهي شوكت يلتم
جفو وصفيت مثلك يخي يلتم
لون نعرف شملنه شلون يلتم
وحياتي مطمع ولا بالدنيه

جرحي ما يفيده اخياط والشل
اخبرك يا حبيبي الدمع وشل
انه شبيدي اعلى الزعل يالليل وشل
شال وصبحت داره خليه

گلبي يلوع ما بطلت ونته
هلال العيد هل وراح ونته
يولف اصباي انه بذچرك دوم وانته
خايب بالوصل تبخل عليه

الدهر طگني ودعه بگلبي يراحاي
الدهر بدل دم السابج يراحاي
الدهر بالچ تامنينه يراحي
الدهر غدار وافعاله رديه

اخبرك حيل بيه بعد ماتم
عليك وبالگلب منصوب ماتم
شبابي وعز شبابك بعد ماتم
وخذك مني غفل سهم المنيه

سيوف الدهر بس وياي يارت
ومن وني جميع العرب يارت
عسى امي لا تلدني كون يارت
اولادة القهر اثرت عليه

اسألك بحضن الولف منام
بسبب واشي علي زعل منام
ربع الليل اليمر عليك منام
لا والوحش ديارك عليه


من دمعي رعاة ارتوت ونعاي
ومن وني انحنه الفولاذ ونعاي
يظل هذا ونيني عليك ونعاي
لمن يصفه الوكت وتعود اليه

القهر والاخ من صغري بدالي
وانه چم كاس الهنا دهري بدالي
لون تصير يا عاذل بدالي
تشوف شلون الام الدنيه

وحگ اللي انذبح بالطف وريده
احبه وبي الي رغبه وريده
اريد اصبر وخله وريده
اشوف شلون تاليته عليه

ناحل وامشي مكابر تراني
تراه الموت يدهاني تراني
واجلد خاف عدواني تراني
واگوه من يمر شامت عليه

بده وطر المنازل ياعلينه
عثر ونصيح كلحنه ياعلينه
على اهلك غيض ناچل ياعلينه
ادركني لا تشمت اعداي بيه

ردتك ذخر عد راسي وساده
وردتك سور للعيله وساده
وبعد لا تامن لمومن وساده
التشوفه حبل تراه راس حيه

ربي ليه القهر خصص وناله
الناس النعم سلوتها وناله
وكلمن اخذ محبوبه وناله
وانه نلته وفلت من بين اديه

بحياتي ما شفت ياناس راحات
اجيبن هاي كالو ذيج راحات
الليالي الماحسبت تروح راحات
اجتني الماردتهه تمر عليه

الهوى والله يذوب گلوب منصاد
وعمت عينه حبيبي بيوم منصاد
چنت صياد ماهر وابد منصاد
ولچن هسه انصدت غصبن عليه

هلا بالبيگ كل لسان ينشد
وبسمك كل حبل مگطوع ينشد
شگل للگصدني عليك ينشد
اگله مسافر لو درس تحت الوطيه

الدنيا شگد هم ودرد فيها
وسبعه وبس عليه ضاگ فيها
بناله دار يسكن عود فيها
ترك داره وسكن تحت الوطيه

يهالواگف على الازلال لاله
وخدك من شعاع الشمس لاله
لزمنه من الخدود وصاح لاله
بثنيت اهلي وتمد ايدك عليه


ابه افركچن لما ادميچن يراحاي
بسبب كل حين تلچمن يراحاي
الچ ضنه بعد بيهم يراحاي
لو گطع النزاع وهاي هيه

اسألك عن عفيش البر بيادار
احصدوه وبيدروا منه بيادار
اانشدك عن ثلاث امسن بيادار
الگمر وسهيل والنجمه السريه

ملوم الناس حيل اوياي منداي
انادي ولااظن يفيد منداي
الك راي بدليلي راي منداي
عظيم وبالتوالي يعم عليه

عسه لاطاب عيش الوكت بعداك
عزيز ولا علي بالهون بعداك
على الدنيا العفه ياصاح بعداك
جوار الدارسه وتبيد بيه

نكت بدعي دموع العين وتهل
وگظيت العمر بس حسرات وتهل
عادات البدور تغيب وتهل
غبت مالك يبدر الما تحيه

گصن ما زعزعن عزمي ولاذن
او بيه احتمت نكباتي ولاذن
اذا ناديت ماتسمع ولاذن
تبقن لا حياة اعله الوطيه

هاگلي يصاحب بعد شملاك
تشتت وانجسم نصين شملاك
اشبگه عندي اشخله الدهر شملاك
ابطرگ روحي العزيزه وهاي هيه

زماني حط الي عله يعله
ينزل الفوگ والواطي يعله
اود هسه العمر يگضي يعله
ولا عيش المذله يدوم اليه


زماني ملته روحي وملها
جفاها وگطع رجواها واملها
المصايب صرت انه ابوها واملها
بعد ماظن سروري يعود اليه

اشبصرك بالمصايب طبگ لو جن
احمدني ولاتلوم العگل لو جن
اذ الوجن تراني بسبب لوجن
الكرامه اودارهم ضلت خليه

تعال وشوف كل اعضاي ماجن
وانه صبر وعگل ماجن
اخبرك بالليالي جفن ماجن
بعد هيهات عودتهن اليه

روحي الماتذل ابدن وتابه
اصبحت طوعك بماتامر وتابه
السماحه بين كفينك وتابه
اخذ عكلي ودوجها يرشد اليه

الدهر غادر لعند النذل حبله
گصه والتف على الطيبين حبله
الرزيه تعت صار سنين حبله
معسره ولا اضنهه تجيب هيه

شبه جيد المها لو راد يلتاف
جفل وابعد ولا ظنيش يلتاف
حدي وياه لمن علي يلتاف
الچفن واتوسد تراب المنيه

يفز مثل الگطا كلبي منشفاه
وعلي الچان مشروبي منشفاه
عسه كلمن گطع شفي منشفاه
بمرض لا للشفا ولا للمنيه



گبل اديار خلاني لهاويد
مغبره او طير المنچر لهاويد
بعدهم لايلذ عيشي لهاويد
شيهودني وناري سريه

دوري بلهوة الحسرات يرحاي
بعد ماشوف دهري ابفرح يرحاي
نزف من حين فركاكم يرحاي
عبيط ونار دلالي سريه

تلوب الروح عيب ادري شملها
تون ولا فرح ساعه شملها
مته يلتم بعد فرگه شملها
وتعود الها لياليها الزهيه

من خدك اشمن دوم ورداي
ومن ريجك يحلو الريج ورداي
ابليل اشفاي اذب غطاي ورداي
السبب لن نارك بگلبي سريه

يحادي اضعون ساهي العين مرهان
نودع اللي بلب الگلب مرهان
شفت حلو الليالي وضگت مرهان
مثل يوم السرو ما صار بيه


ابضعن هجرك يناهي اليوم ماريت
اسلبت عگلي ولعند الريح ماريت
شفت كثرت مصايب ابد ماريت
مثل هذا مصابك فتك بيه

الدهر ظالم على الانسان لا جار
ما يرحم بنون احشاه لا جار
لا منهم صديج الفزع لا جار
ولامن راضع وياهم سويه

اشلون ايام دهري وياي هايت
ابحزن وانه من الشمات هايت
اصيح ولا صديج يگول هاييت
معا الشامت وگف ينظر عليه

اگظي الليل الك يا ترف منطار
عليكم والگلب نصين منطار
ماشوف طير ارتفع منطار
يطير شما يطير ارضه الوطيه

يخي بس بالمصايب ولعيانه
والنوايب علي دارت ولعيانه
اخذ دهري عزيزي ولعيانه
وشعر من هاي حبله التف عليه

عفاني وثگل اجدامي وهمها
ابو النكبات دلالي وهمها
يبويه انت خلصت منها وهمها
كورته وبگه داير عليه

دمعتي صلت خدي من يرتبه
العگل بالراس غيرك من يرتبه
رزيتي مثل يوسف من يرتبه
على يعكوب وانه اعظم رزيه

علامك ياجفن ما بطل وشلاك
افضحتني يصير اكظلك خيط واشلاك
دبس امن الرشيح ابعد واشلاك
المضه ماضن يعود النوب اليه

يخي والله المصايب لذعني
ابدليلي يوم شخصك لذعني
ابد ماشوف شامت لذعني
مته تحضر يطيب النوم اليه

نحولي عم على جسمي وراكيت
فرح مادام الي دمعي وراكيت
احبابي جيت لحماهم وراكيت
ردتهم عون اجوني ويه السريه



علامك يا عگل صابك شراكاي
اشمريد انهض على داير شراكاي
احبابي الچانو ابهمي شراكاي
گطع بيهم زماني وخان بيه

يحادي روعت گلبي بلحداي
ويخايب لفني وياهم بلحداي
اون طول الدهر حتى بلحداي
السبب شالوا وخلوني شجيه

حادي الليل حده ياليل ولاون
ابحداهم مادريت المن ولاون
احاه ما اگول من جرحي ولاون
چيف ادواي عد شمات اليه

عگب عينك يخويه الحال ما حال
شبت والشيب وكته بعد ما حال
روض الماشوفك بيه ما حال
ربيع يصير من تجبل عليه


ــــــــــــــــــــــــ
حسين الساعدي
مال اسهر وَصلي مال اَداعي
عليك ويل صدودك ماله داعي
أنه اتحسف دعيتك مالي داعي!
وجيب الما يمر يسأل عليه

ـــــــــــــــــــــــــــــــــ
حسين الساعدي
تنيتك عمر كله اسبوه بس تان
وتان روحي عليك وبقت بس تان
تريد الواحتك يل بيك بستان
وافرهد كل ثمر ناضج بديه
ـــــــــــــــــــــــــــــــــ
حسين الساعدي
أبد ما كَلبي غَير بيك رايه
وشفت بيك ابمنامي أمس رُيه
كأن الحربي انت ارفعت رايه
تعال وخلنه نتعاون عليه
ـــــــــــــــــــــــــــــــــ
حسين الساعدي
عمت عين الزمن لعداك وداك
ونكر ودك هذاك الجان وداك
دواك انفقد ياللاسف والداك
جعل شخصك على افراش المنيه

ـــــــــــــــــــــــــــــــــ
حسين الساعدي
اشتم بالزمن كل يوم والعن
ابسبب نيرانه وسط احشاي ولعين
صادفني اويه حلو الطول والعين
وخله الهل وكت ناري سريه
ـــــــــــــــــــــــــــــــــ
حسين الساعدي
ميهمني الزمن منه اشماته
بس لا ابجي وتعاين شماته
حبيبي من الورد احله شماته
خسرته وجان عطره ابين اديه
ـــــــــــــــــــــــــــــــــ
سمير صبيح
طبع بية ابد ما اذم .. ولاداس
وجدمي ما خطة الشينة .. ولا داس
لذلك ما ربح حضّي .. ولا داس
وصفة حتة الربح خسران الية
ـــــــــــــــــــــ
سمير صبيح
الدنية شكد احبنهة .. وابرهة
تزرفني بمخايطهة .. وابرهة
جاعت ناكتي واكلت .. وبرهة
الدرب طول واخاف ترد علية
ـــــــــــــــــ
سمير صبيح
عليمن تحسب اخطائة .. تعد له
الميت بالبجي شتظن .. تعدلة
العوج عودة صعب ظلله .. تعدلة
يظل اعوج لما تلفة المنية
ـــــــــــــــــــــــــ
رحيم المالكي
العواذل حبلة بية دوم .. طالق
سهم بعيونهم للموت .. طالق
بعد ماخاف كلت للخوف .. طالق
الشجاع يموت والروحة رخية
ـــــــــــــــ
عباس عبد الحسن
المصايب غير كلبي .. مالهنة
وابد عنك يصاحب .. ما لهنة
دمعي عليك الاصلي .. مال اهلنة
ودمع تمساح من تبجي علية
ـــــــــــــــــــــ
رحيم المالكي
بحرك كمت دورتة .. وبرك
بعد ما ينفع ايمانك .. وبرك
اذا مخيط الك نابت .. وبرك
وشم دكن بصدري من الاذية
ـــــــــــــــــــــــ

عبد الحسين الحلفي
كبل من اصل طيب .. فرعينة
وهسة العكل طاحت .. فرعينة
الوكت يخزر علية .. فرعينة
درت عنة وبقت عينة علية
ـــــــــــــــــــــــ
عبد الحسين الحلفي
يا دنيا وياي بعد وبعد .. جدي
وعلي صيحي بعالي الصوت .. جدي
هجمتي بيت ابوي وبيت .. جدي
وانة بلا بيت شتهجمين الية
ــــــــــــــــــــــ
عبد الحسين الحلفي
أشّفنة من عمرنة .. شفتهمنة
وهمنة كبال عينك .. شفتة همنة
ذبحنة وفوك ذبحة .. شوف تهمنة
يكلهم بالذبح تعبولي ادية
ـــــــــــــــــــــ
عبد الحسين الحلفي
احباب الروح كلبوا فرد .. كلبة
ووكتنة بلون نص الليل .. كلبة
دفعني وانكلبت شلون .. كلبة
وسحكني ومن عثر ضل يسب بية
ـــــــــــــــــــــــــــــــــــــــــــ
عبد الحسين الحلفي
يدنية كافي دخنة .. شرّطينة
وشرط سجين بيدج .. شرطينة
نشف ماية عمرنة .. شري طينة
دخل يلحك بماية وهاي هية
ــــــــــــــــــــــ
عبد الحسين الحلفي
شفافك عسل وحصتي .. مرة منهن
وكطعلي جلاي سهمك .. من رمنهن
وجم مرة لحكتك .. مرة منهن
مو انتة طلعت وشصار بية
ـــــــــــــــــــــــ
حسين الساعدي
من الله الحلو عنده وداعه
ايتقبله الله كل طلبه وداعه
لكن صعب مو هين وداعه
امودعينه ابخت حامي الحميه
ـــــــــــــــــــــــــــــــــ
رحيم المالكي
يكلبي ما نفع تعبك .. ولا رباك
وحصتك صارت الدوخة .. والارباك
بطريقك بعد ما اعاين .. ولا ارباك
من اطيعك هم تردني الحفر حية
ــــــــــــــــــــــ
سمير صبيح
روحك هم مثل روحة .. بها ون
وتدور عالفرح كاعد .. بهاون
جبت عمري مثل كهوة .. بهاون
يدك والنار عين الهة علية
ـــــــــــــــــــــــــــ

رحيم المالكي
لان دكات شماتي .. بهاماي
وشل لا تظن عيني .. بها ماي
اذا عالذل رضة يبصم .. بهامي
اكطعة ان جان يرضالي بردية
ــــــــــــــــــــ
سمير صبيح
اسكت لا تظل تشكي .. بهاماك
وتلوم الروح وتعضعض .. بهاماك
اخذ طبع النخل وارفع .. بهاماك
واذا بالطين عركك هاي هية
ـــــــــــــــــ
رحيم المالكي
انة الواضح والمبين .. ولا خاف
وانة الما رجفت جدامي .. ولا اخاف
وانة الما نكص وزني .. ولا خف
اختفيت وخفت خف وزن العلية
ـــــــــــــــــــــــــــــــــ

سمير صبيح
حميتك دافعت عنك .. ورحماك
الطعن اهون ولا الوذن .. ورة حماك
كلت اوليك ما اعوفك .. ورحماك
وليت وطيبتي العمت علية
ـــــــــــــــــــــــــــــــــ

رحيم المالكي
حبيبي جروح الك بالروح .. حالن
وامس جنت احسن من اليوم .. حالن
اريدك تنتخيلي وتمر .. حالن
باجر وين ما تلحك علية
ـــــــــــــــــــــــ
سمير صبيح
مهلة انطيني واصبرلي .. لعلماك
اخاف تكول ما يدري .. لعلماك
انة السارية الواكف .. لعلماك
من اطيح تطيح خركة على الوطية
ــــــــــــــــــــ
رحيم المالكي
اتّنخة تريد اجيك اليوم .. بالحال
وانت اعرف حبيب الروح .. بالحال
شمحلهة وياك ما تقتنع .. بالحل
ادليك الدرب وترد علية
ــــــــــــــــــ
سمير صبيح
الحزن لايك على كلبي .. ويا فت
فت حيلي ومعا شوفي .. ويا فت
عبّت وانتهت كلش .. ويا فت
اشم بالذيل والراس البلية
ــــــــــــــــــــ

سمير صبيح
طبعك مو شجي وكتلك .. شجي آني
شجنيت وياك شو كللي .. شجاني
امس جنت انحضن وانشم .. شجاني
كنفذ والحضن حسرة علية
ـــــــــــــــــــــ
سمير صبيح
نهر خيري طفح لتكول .. زل ماي
شجاهة وما تردلي الثار .. زلماي
يمشيني على راية شلون .. زلماي
ولا جني ابن حامي الحمية
ـــــــــــــــــــ
حسين الساعدي
إمن ايدك قيدتها الروح بسلاك
الفرح الهم صفه والحزن بس لك
ادري ابلا مرض يل طحت بسلاك
لان ياخوي نضرتهن بليه
ـــــــــــــــــــــــــــــــــ
تراث شعري
طار وما كلت للناس .. عالطار
وشسولف عالجرح بالكلب .. عطار
جنت وياك شايل خلك .. عطار
طفل ما تشتري وتلعب علية
ــــــــــــــــــ
جبار رشيد
حبيبي بيا بخت وياي .. شديت
وعدة هجرك الي شقدمت .. شديت
باصبعك حتة تذكر خيط .. شديت
انحصر دمك ولا فكرت بية
ـــــــــــــــــــ
جبار رشيد
مشغولين بيمن .. من شغلكم
ولو مو شغلي هذا .. من شغلكم
بعد ما راح ابيجي .. ومنشغلكم
اموتن راح واخصمهة القضية
ــــــــــــــــــــــ
جبار رشيد
اليحبونك لصدك .. لا تسلهم
وابد عن سبب حبك .. لا تسلهم
من احجي وياك عفية .. لا تسلهم
احس تاخذ الروح بغير جية
ـــــــــــــــــــــ
صباح الهلالي
بسواد العين يسمر .. من ترابي
شعجب كلبك تغير .. من ترى بي
انة ما ظن ترابك .. من ترابي
حضنتك والعسل جلّب بدية
ــــــــــــــــــ
صباح الهلالي
سلالتكم نسب يوسف .. نسبهة
الدنيا بلاية نضراتك .. نسبهة
الوادم مية بالمية .. نسبهة
بس نسبة جمالك سبعمية
ــــــــــــــــــــــــــــــــــــــــ

رحيم المالكي
عليك الليل كلة .. انة وانة
ومعاك العتب هسة .. ان اوانة
اتهدد بالنفاهة .. انة وانة
وينك مو طفك دهري علية
ـــــــــــــــــــــــــــــــــــــــــ
عريان سيد خلف
نبي ونجبر خواطر .. من يبينة
وسر موج البكلبي .. منية بينة
اذا مرة انتخينة .. من يبينة
نهد العالية بعلو الثرية
ـــــــــــــــــــــــــــــــــــــــــ
عريان سيد خلف
العلية غير اهلهة .. من علاهة
وروحي خسة الكللك .. من علاهة
بعزم الله نخلتي .. من علاهة
يراموهة بحجر وتظل سخية
ــــــــــــــــــ
رحيم المالكي
انة روح الليالي .. مرسنهة
اصيلة انتة تعرفهة .. من رسنهة
سيوفي مغمدتهة .. مرة اسنهة
ركاب عداي مبردهن وادية
ــــــــــــــــــــ
عريان سيد خلف
اعلل بالوصى وروحي .. علني
سوالفكم بدلالي .. علني
ليالي الجنت صادرهن .. علني
وغدت عجلة مخالبهن علية
ـــــــــــــــــ
عريان سيد خلف
يكلبي شكثر يحمل بعد .. يملاك
تعدى والعقل بالصبر .. يملاك
ابن ادم لو ملك قارون .. يملاك
وبلا اخلاق ما ينشرب مية
ــــــــــــــــــــ
كرار
الشوك وياك صدفة .. قابلاني
وشيجري علي منك .. قابل اني
تقشمرني بضحكتك .. قابل اني
غشيم وتعبر الضحكة علية
ـــــــــــــــ
حسين الساعدي
صرت مكسور ماجن ونتخلك
لا تحرك ابروحك وانت خَلك
يوم الطحت وحدك وانته خلك
تشفه ابطيحتك قبل المنيه
ـــــــــــــــــــــــــــــــــ
عبد الحسين الحلفي
ها تعبي حبك .. ها اذاني
دخت اه يا صلاتي .. هاي اذاني
اكول التوبة ما احب .. هاي اذاني
اهد ذاني ويرد حبك علية
ـــــــــــــــــــــــ

عبد الحسين الحلفي
عسل وبحلكي وكتي .. مر جعلكم
ومرجعكم بكلبي .. ومرجع الكم
جنت آية بهواكم .. مرجع الكم
خذيتوا منين فتوة وخنتو بية
ـــــــــــــــــــ
عريان سيد خلف
وحك البالمهد ربة .. وحالة
الدنية وياي للهامة .. وحالة
صديقي هد علي جلبة .. وحالة
الجلب رد وصديقي الهد علية

عريان سيد خلف
تكتر لانة من وشرك .. وصنفاك
وتأدب من تحاجيني .. وصن فاك
انة الصعدك باية .. وصنفاك
جبل لو صرت ما تعلى علية
ـــــــــــــــــــــــ
عريان سيد خلف
اتلعثم من اشوفك .. وسطكانة
ومنو الوشوش بذانك .. واسطكانة
تكللي وينك انتة .. وسطكانة
دور عالنبض تعثر علية
ـــــــــــــــــــــــ
يوسف السوداني
حجلهة على الدرج بذني .. تشرشال
وعليهة يلوك من تصعد .. تشر شال
نابليون اظن جدهة .. وتشرشال
غزت كلبي بحربهة العالمية
ــــــــــــــــــــ
حسين الساعدي
كض سجين والدلال وَذره
واخذ وياك من اتروح وِذره
لون انطحن وسط الريح وذره
ارد انجمع بس تسأل عليه
ـــــــــــــــــــــــــــــــــ
حسين الساعدي
دارك خاليه اتحسر شمرها
وبعادك دمعة من عيني شمرها
وطعم دنياي من بعدك اشمرها!
مرارتها أمر من المنيه

ـــــــــــــــــــــــــــــــــ
حسين الساعدي
عُشر حزن الحزنته ترى فاتاك
ويمن سهر الفتتني كون فتاك
إذاَتدري بعيونك سهم فتاك
ليش اتفوت وتعاين عليه

ـــــــــــــــــــــــــــــــــ

عبد الحسين الحلفي
بست وجه التراب وكمت .. عناي
الك يللي كطعت الوصل .. عناي
افز فزة حياية التفز .. عالناي
بحلم لو مر صدة صوتك علية

ـــــــــــــــــــــ
ستار اللامي
دكافي من البعد يا ترف .. بس بس
من البذنك عن الهجران .. بس بس
كبل تركض تجي لو صحت .. بس بس
شجاك شغيرك هسة علية

ــــــــــــــــــــــــ
ستار اللامي
قبل عنكود خدك .. يمي داني
سطست وجفن عينك .. يم ايدي اني
اغم كصتي واكولن .. يمداني
يمي وما خذت ثاري بدية
ـــــــــــــــــــــــــ

ستار اللامي
بدمع عيني كتبتلك .. خاطر انة
والك ما يوم كاسر .. خاطر انة
غير انتة تجيني .. خاطر انة
اجيلك معتني زحوف على ادية
ــــــــــــــــــــ
رياض الحار
الرقي صار الجنابك .. برتقالي
وعلى الحاضر حويتة .. برتقالي
اذا انتة مزاجك .. برتقالي
تكتر لا تذب ضيمك علية
ــــــــــــــــــ
حسين الساعدي
شعوري بيك مني اتضيع شاعر
يل بحساسي ماظن يوم شاعر
انجنيت ابهواك وصرت شاعر
مثل قيس اويه ليلة العامريه
ـــــــــــــــــــــــــــــــــ
مجهول
قطار الباك حسنك .. مر عداني
اووباء الون اخبرك .. مر عداني
ولك سجين بعدك .. مرعداني
وكمت بجفاك اون اني علية

ــــــــــــــــــــ
مجهول
هلة يالكل عشرتي وياك .. ماسات
واسكر لو شفاي شفاك .. ماسات
الك خدين بيض تكول .. ماسات
من ابوسك ينعكس وجهي علية
ــــــــــــــــــــــ
شاكر التميمي
الكلب سلمتة بيدة .. واردة منة
وحال الثكلى حالي .. واردة منة
اجتني بيوم صوغة .. وردة منة
طبت ماظل بعد كل مرض بية
ــــــــــــــــــــ
حيدر الساعدي
كلبي شم عطر خدج .. ورا ساج
وعلى مرمى العشك حطج .. وراساج
احلف بالعشك واهلة .. وراساج
ما اعوفج لون تدنة المنية
ـــــــــــــــــ
علي الفريداوي
حضر سويت لاجلك .. من حضرتك
ونسيت انتة وكفتي .. من حضرتك
ورة خشمك تكللي .. من حضرتك
حضرتي ان جنت امر تاخذ تحية
ـــــــــــــــــــ
مجهول
علي نظرتك بالشر .. لحسمنك
ومثل يوم بحياتي .. لحسمنك
لون مرة تصحلي .. لحسة منك
سنة السكر يظل مرتفع بية
ــــــــــــ

مجهول
طحت والكلت مد ايدة .. جر يدة
وصرت مثل النخل جني .. جريدة
حبيبي اذا يحب يقرة .. جريدة
الجريدة تكوم تقرالة القضية
ــــــــــــــــــــــــــــــ
مجهول
قصر بكلبي الك شيدت .. ماخان
وعليك الصوت عالي وابد .. ما خان
نادو خانك وناديت .. ما خان
وفي بردة طرف ماخان بية
ـــــــــــــــــــــــــــــ
عريان سيد خلف
اذوبن لو عيونك علي .. تنصاد
وشما توصل لحي مصدود .. تنصاد
اذا انتة التعرف الناس .. تنصاد
اذن انة الغشيم شلون بية
ـــــــــــــــــــــــــــ
عريان سيد خلف
لساني كبال حلو الطول .. لك لك
واحذرك لا تكول النوب .. لك لك
لغيرك ما يصير الكلب .. لك لك
لان انتة شراكة وياي بية
ـــــــــــــــــــــــــــــ
عريان سيد خلف
البدر لاح بجبينة .. والا ليلة
وفر هذا البشعرك .. والا ليلة
عشت ليلة بحياتي .. والله ليلة
غلط بيهة القدر واهداك الية
ــــــــــــــــــــــــ
عريان سيد خلف
علي سهام وكتي النوب .. ينجال
وما ظل عدل بالميزان .. ينجال
سألتة لحم اخوك الميت .. ينجال
يكللي الوكت شرعا حلة اللية
ــــــــــــــــــــــــــــ
عريان سيد خلف
هلة اغاتي تكلم .. من عبيدك
وهذا الهوة اليسري .. منعة بيدك
اغاتك وارد اصيرن .. من عبيدك
ولو ذلة على اسم الهاشمية
ــــــــــــــــــــــ
عريان سيد خلف
تصدك لاني من وشرك .. وصنفاك
وتأدب عاد وي غيري .. وصن فاك
انة الصعدك باية .. وصنفاك
شلون تبيع مالاتي علية
ــــــــــــــــــــــــــــ

عريان سيد خلف
الندم لا ينفع بوشرك .. ولاساف
ولساني ما غلط مثلك .. ولاساف
تظن عالي ؟ واشوفنك .. ولاساف
اقل من اثر شاة على الوطية
ــــــــــــــــــــ
حسين الساعدي
الزمن استاذ والعالم طلابه
وحبك سحر دلالي ان طلابه
اشوفك جاي وتدور طلابه
أنه استسلم واقيد بيدي اديه
ـــــــــــــــــــــــــــــــــ
مجهول
على دوم الليالي تلف .. وتدور
ولاجلك رخصيت الذهب .. والدر
احبك من زمان الدار .. والدور
شعجب لمن كبرنة تخون بية
ــــــــــــــــــــ
مجهول
عشكتك من زغر سنك .. ويهلك
اليحبك ليش يتعذب .. ويهلك
اغار عليك من تمشي .. ويهلك
لجن وية الغريب شلون بية
ــــــــــــــــــــــ
رحيم المالكي
ترف يالصورك ربك .. من العين
اخاف عليك من تمشي .. من العين
انا معذور يمدلل .. من العن
ابوك الخلفك للناس اذية
ــــــــــــــــــــــــ
هيثم سعود
اللي موال خلي .. بستكانة
وشكر ذابت شفافك .. بستكانة
امس بالطيف كتلة .. بستك انة
من اهد ما كتلة ما راضي علية
ـــــــــــــــــ
هيثم سعود
بابي الما نهر جفك .. من اندك
ودعاني انة لو دهري .. من اندك
حنطة وطبعي اظل واكف .. من اندك
اغزر بالوفي وبالطبعة بية
ــــــــــــــــــــــ
حسين الساعدي
دك الباب بيده وصاح من هان
انه الموجود كتله الدرب من هان
ترى اليغدر صديقه ايعيش منهان
ويبقى ابذلته اليوم المنيه

ـــــــــــــــــــــــــــــــــ
حسين الساعدي
النصيحه اتفيد من اهل الديانا
اشخذت وياهه من ماتت ديانا
اعتبر متدين ايامك دايانا
وتراضي الخالقك قبل المنيه
ـــــــــــــــــــــــــــــــــ
حسين الساعدي
بالحب خويه ما تنفع كُباره
طيحهم سوى ازغاره وكباره
جنت بارد صفت نارك كَباره
وتضل طول العمر نارك سريه
ـــــــــــــــــــــــــــــــــ
رحيم المالكي
انعة عليك صدك .. منعة منك
ومنحت الكلب يرفض .. منعمنك
طامع بية ثاري .. من عمنك
شور الكلب بيدك مو بدية
ـــــــــــــــــــــــ
هيثم سعود
هام العكل من شوكك .. وجن بيك
وشبيه الكمر من يضون .. وجن بيك
ابوسك لو يحبسوني .. وجن بيك
اوامر من وزير الداخلية
ــــــــــــــــــــــــ

رحيم المالكي
عليك الدمع ما بطل .. وجاري
هلي ملو كثر نوحي .. وجاري
العلي ما صار بالدنية .. وجاري
صديجي والعدو طبكو علية
ــــــــــــــــــــــــ
رحيم المالكي
يدنية بلومي وشكواي .. حسي
وعن وجهي غبار الضيم .. حسي
اظل اصرخ واصيح بعلو .. حسي
لما تحسين يا دنية علية
ــــــــــــــــــــــ

رحيم المالكي
اغيم وامطر وانخبط .. وصفة
على اللي راح مني وتاه .. وصفة
حبيبي وجان اللي البلواي .. وصفة
اشك الجفن لو مر طيفة بية
ـــــــــــــــــــــ
رحيم المالكي
عليك الروح تسـأل .. ما تسلهة
وتدري انتة العواذل .. ماتسلهة
شمتاني سيوفك .. ما تسلهة
اذا للضيج مر الضيج بية
ـــــــــــــــــــــــــ
جبار رشيد
ماشاء واظن اليوم .. شالاك
واحس الكلب فوك الراس .. شالاك
على شعرك لون ذبيت .. شالاك
تذب عالروح طركاعة وبلية
ـــــــــــــــــــــــــ
رحيم المالكي
مكاطف والمصايب .. رجة رجة
علي وبراسي صارت .. رجة رجة
هلي وخلاني ماكو .. رجة رجة
الغرب حنت ولا حنوا علية
ــــــــــــــــــــــــ
حسين الساعدي
مالك يازمن وياي مالك
قسيت اوياي جني اسرقت مالك
أنه ابدنياي بس الحزن مالك
وانتَ اترادف البلوه عليه

ـــــــــــــــــــــــــــــــــ
محمد الغريب
الدنيا شكثر تطلبني .. لها دين
ولها رجلين طكّني .. ولها دين
لون غيرة وشرف عدهة .. ولها دين
جا ما شاخ بيهة ابن الردية
ــــــــــــــــــــــــــ
رحيم المالكي
يسامي الجيت ابشرك جيب .. بشراك
بحقل الغام روحي صفت .. بشراك
انة مدوهن وبية تلوم .. بشراك
يعمي الطعن بالميت خطية
ــــــــــــــــــــــــــــ
حسين الساعدي
قطعة من القمر لو شال ردنه
وما نفترق ساعه ابيوم ردنه
يربي ازغار أنه اوياه ردنه
حتى ابلا حرج نلعب سويه

ـــــــــــــــــــــــــــــــــ

محمد الغريب
يمن طيفك ببيب العين .. مر ضاي
انة بغيرك لون بالحور .. مرضاي
انة هم العلية وسبب .. مرضاي
فراكك والشماتة الكصت بية
ــــــــــــــــــــــــــ
رحيم المالكي
اكو وادم بخت ماكو .. ولا حظ
اخافن كمت من عدهم .. ولاحظ
يشامت عاين الحالي .. ولاحظ
صرت عودان وامشي على الوطية
ـــــــــــــــــــــ
محمد الغريب
انة بخلكي فلا ظلت .. وساعة
على حضي الما ثمر تعبة .. وساعة
اعارك بالوكت ساعة .. وساعة
اسلم للوكت واشكف بدية
ــــــــــــــــــــــــخ
رحيم المالكي
رشيق الطول كال بشعر .. صفنة
وجمالك بالشعر يحتاج .. صفنة
بطولك من تجي وتصير .. صفنة
صفر ينطونة وينطوك مية
ــــــــــــــــــــــــــ
محمد الغريب
اثكل يا خفيف الدم .. ولك عن
همومك طبعن بكلبي .. ولكعن
الك شعر الاخذ عقلي .. ولك عين
احسنهة تشتم والدية
ـــــــــــــــــــــــ
نشأت الخالدي
خنتي وكلتي مو اني .. بلا انتي
مو طركاعة بية انتي .. بلة انتي
الوكت صفر الج ضدي .. بلانتي
شجاج انتي وضربتي الكول بية
ــــــــــــــــــــــــ
نشأت الخالدي
لفراكك جمر ابجي .. ونيران
يالوجهك يشع رحمة .. ونيران
تمنيت العراق انتة .. وانا ايران
وحدودك دوم فاتحهن علية
ـــــــــــــــــــــــ
صباح الهلالي
اختلفنة بأولياء الله .. وضعنة
واحنة الساس للدنية .. وضعنة
صدك ما نغير من .. وضعنة
شرط الا تحط ايدك بدية
ــــــــــــــــــــــ
حسين الساعدي
زماني حَضر اسهامه ونَشاب
وغزاني الشيب يايمه وأنه شاب
وقهرني اليضحك ابناري وانه شاب
لا يسكت ولا ايلحك عليه
ـــــــــــــــــــــــــــــــــ

ناظم الحاشي
أسلم ما ترد مالك .. عسلماي
وبيك يصير من هجرك .. عسة الماي
دكللي الندة البشفافك .. عسل ؟ ماي؟
حليب ودرتة شفافك علية ؟
ــــــــــــــــــــــــــــــــــ
عبد الحسين الحلفي
محبتك كهربتني .. شارة بيهة
وحجة كلبي وية عقلي .. شارة بيهة
محبتك جنهة سيد .. شارة بيهة
علة غيرك باوعت شورت بية
ـــــــــــــــــــــــــــــ
عبد الحسين الحلفي
شقة ما عندة كلش .. كدوطنة
كبر شيب واصبح .. كد وطنة
بوطنة انصب جادر .. كد وطنة
وقرينة الفاتحة ومتنة سوية
ـــــــــــــــــــــــــــــــــــــ
عبد الحسين الحلفي
الوجود شفرقة كللي .. من عدمنة
وشمل منع التجول .. منع دمنة
وتدري ليش احنة .. منعدمنة
لان موتة نولدنة على الوطية
ــــــــــــــــــــــــــــــــــ
عبد الحسين الحلفي
العتب عالكتب هالدستور .. عالسن
بوطنة زعلت الضحكات .. عالسن
انعلسنة والشعب معلوس .. عالسن
وقفلتة ونعلس قفل الابوذية
ـــــــــــــــــــــــــــــــــ
عبد الحسين الحلفي
امك تنعة وانة انعة .. نعة متين
وجيتك نعمة والضحكة .. نعمتين
شفافك تين لتكللي .. نعم تين
اخاف تكول ويموعن خطية
ـــــــــــــــــــــــ
عبد الحسين الحلفي
عدل صوبك جدامي .. جر عدل لك
وادليك بحجي المر .. جرعة دلك
اثكل كافي بسك .. جر عدل لك
زعلت لتجر عدل حقك علية
ـــــــــــــــــــــــــــــــ
عبد الحسين الحلفي
بسراية العشك روحي ..وكصرت لك
ونفس وكت المزامط .. وك صرت لك
طويل واعلى منك .. وكصرتلك
حتى تلوحني من تبوس ادية
ـــــــــــــــــــــــــــ

عبد الحسين الحلفي
خطية اسمك على اسمك .. ماشخطنة
ازدحام احنة على دربك .. ماشي خطنة
شتظن من كد حلاتك .. ما شخطنة
اليشوفك ينشخط مية بالمية
ـــــــــــــــــــــــــ
حسين الساعدي
عليهم حشمت يمه وساده
الحرير العدهم املون وساده
وحصيره املك وجاكيتي وساده
لفوني وفرهدوهن من اديه
ـــــــــــــــــــــــــــــــــ
نائل المظفر
امتحنتك ردت اجربنك .. صح تحل
تشد جرحي واذا شفته .. صحة تحل
بعدني ما طحت يمك .. صحت حيل
لو طايح صدك شسوي بية

 
التعديل الأخير:

أقسام الرافدين

عودة
أعلى أسفل