الفرق بين الأنانية وحب الذات والإيثار واني اجي علي نفسي

الإهداءات
  • غزل من من قلب الغزل ..:
    ضياءٌ شعَّ من أرض المدينة و زُفَّت البشرى لرسول الله (ص) بولادة سبطه الأول الإمام المجتبى (ع).✨💚
  • غزل من قلب الغزل:
    "يارب دائمًا اعطنّي على قد نيتي وسخر لي الأشخاص اللي يشبهون قلبي🌿✨. .
  • غزل من قلب الغزل:
    مارس الرحمة قدر المُستطاع فكلما تلطفت مع خلق الله زاد الله لطفهُ حولك.💐
  • غزل من قلب الغزل:
    اللهم إنك عفوٌ كريمٌ تحب العفو فاعفو عنا ♥️😌
الفرق بين الأنانية وحب الذات والإيثار واني اجي علي نفسي

الأناني : ياخد ميعطيش ، المهم أنا وراحتي وسعادتي ومش مهم الآخرين ، ونتيجة كسره لقانون التوازن ( التوازن بين الاخذ والعطاء ) ، فبيستحق أن تُسلَب منه أبسط حقوقه سواء لما يدخل علاقة او ابسط حقوقه انه يعيش مرتاح نفسياً او مادياً ، وعلامات الشخص الاناني انه بيصاحبه الحزن والمشاكل وهيلاقي ان الدنيا مقفولة في وشه مهما سعي ( لانه عاوز ياخد وبس ) وهيلاحظ الشح في المشاعر مش هيلاقي حد يعطيه مشاعر وحب واهتمام ، السر لأنه مش بيعطي نفسه ولا الآخرين المشاعر دي ، مش مكتفي بنفسه ، يتعرف علي حد ياخد منه مشاعر ، بيقدم علي شغل عشان ياخد فلوس ، بدل ما تكون نيته انا هنفعهم ازاي وطبيعي هاخد مقابل لنفعي فانفعهم اكتر

الي بيجي علي نفسه ميلومش غير نفسه ، دا بيكون عكس الاناني ، الاناني المهم انا مش مهم الناس ، دا المهم الناس مش مهم انا ، بيهتم وبيعطي للآخرين وهو آخر اهتمامته وبينسي نفسه وبكدا بيظلم نفسه فبيستحق ان تأتيه ناس تظلمه وتستغله لأنه هو الي لم يقدر نفسه ولم يحب ذاته ، بيجي علي نفسه عشان ينول رضا الناس وانهم يقولوا عليه الطيب الي بيسمع الكلام الي مش بيقول لأ ، الشخص الي بيدور علي رضا ومدح الناس ، اه هيفرح شويه لما يعجبهم ولما الناس تقلب عليه هيتأذي جامد لإن الناس مش مضمونه ، لو كلامك علي هواهم هيمدحوك ولو قولت رأي مخالف للي اتربوا عليه هيخسفوا بيك الأرض ، ولأنك بتتأثر بكلامهم الحلو وهو دا الدافع لاستمرارك في العطاء ، فبالتالي اول ما تغلط غلطة والناس تهاجمك هتتأثر جامد لانك ربطت قيمتك برأيهم ، فالناس أصبحت مصدرك بدل ما يكون مصدرك ربنا

حب الذات : انا أولا ثم الآخرين ، الي بيحب نفسه بيجعل نفسه هي اولي اولوياته وعلي رأس اهتماماته ، مكتفي بنفسه بيعرف يشبع احتياجاته المادية والعاطفية ، قوي ومسؤول ومنطلق وشجاع ومغامر وماشي بالمقولة الي انا بحبها شخصياً ( ويفوز باللذات كل مغامر ) ومستقل بتفكيره وبكل شئ ومش تابع لحد ، عمره ما يجي علي نفسه عشان خاطر حد ، إن مكنش هيعمل الخدمة بطيب خاطر وسعادة مش هيعمل ، مبيعملش حاجة غصب عنه او لانه محرج او لانه مكسوف يقول لأ ، هو اتحرر من كل دا ومش فارق معاه رأي الناس ، عارف ان في ناس هتحبه حتي النخاع وفي ناس هتكرهه ، ملتزم في تطويره لنفسه وعارف هو عاوز ايه ، ولما بدأ يحب نفسه فهم يعني ايه حب الحياة وحب الخالق ، وكل يوم وهو بيسعي في الحياة بياخد قراراته الي تعبر عن حبه لنفسه من بناء عادات وافكار جديدة ليصنع عالمه الخاص

الايثار : هنا بيكون اتعلم يحب نفسه ويحب الآخرين وفهم إن كلنا متصلين ببعض فلما أساعد حد أنا كدا بساعد نفسي ولما أؤثر حد علي بكون راضي وسعيد مش متضايق ، ومش مستني منه شكر او امتنان علي عطائي ، انا خلاص حسيت المشاعر الحلوة وانا بعطي أصلاً ومش مستني إنه يرد الخدمة لي ، ومش هتضايق لو انكر الخدمة ، انا بعطي بلا شروط ، لكن الي بيجي علي نفسه لو الآخر مقدرهوش ولم يشكره ولم يرد له الخدمة هيزعل ويتضايق ويبطل يعطيه ( لانه في العمق هو كان بيعطي عشان ياخد ، مش بيعطي لانه حابب يعطي ومش مستني اي شئ )

ازاي تعرف إن كنت مؤثر في موقف معين ولا جيت علي نفسك؟ "من مشاعرك" ، انك تكون مبسوط وانت بتعطي ولو حتي شتمك مش هتزعل منه يبقي ايثار ، ولو زعلت تبقي جيت علي نفسك خد بالك

العطاء نوعين ( مشروط ولا مشروط ) اعرف امتي تعطي بشرط وامتي تعطي بلا شروط ✨
اسعي ان تتعامل في عملك بالنوعين لتحقق التوازن والنفع
#لعبة_العلاقات
#محمد_أيمنFB_IMG_1625252469604.jpg
 

أقسام الرافدين

عودة
أعلى أسفل