من عرفتك .. ﭼـنّي ما ﭼـنت أعرف أحد ..
الشيب الـ بلون الثلج خضّر سواد
ووجهيّ المطلگه الضحك ..باللحظة ورّد ..
من عرفتك .. بعد كل ذيـﭻ النوايب صرت مِسعد ..
راح الغراب الـ گبل يفتر عليّة
وصوت بلبل صرت اسمعه بروحي غرد ..
من عرفتك ..
گمت أحس كل الخلايا الماتت بروحي تتجدد ..
نزعت من اسنينها تلاثين روحي
وردّت لـ عشرينها بلا خجل تنعد
أنت مدري شلون أجيت .. بغفلة شو ﭼـنك قصيدة..
اتولّت الشاعر ﭼـوي وما رضت تبرد ..
وشرد أوصفك؟!! ..
وأحنه يبن الناس من دم ولحم بس أنتَ من ليلو وزمرد
أنت مرود للكحل بين الكحل والعين مرود ..
انت رحمة وفرّحت مسكين من أمة محمد ..
والله من تگلي أحبك ..
أنا أحس بـ أعصابي من فوگ الجمر يا روحي تجمد ..
ولا تدليني بمكانك ..
هذا انت وداعتك وي النفس تنزل وتصعد ..
ومن مشيت الفرحة الـ بعيني طفت
ورَد على الخمسين عمري
والثلاثين الحذفهن ويّ عشرين الشباب اتوالفت ..
وگمت أشوف الضحكة دمعة ..
ودثرّت روحي بجمرها وما دفت
أتعارك بعيني الأرق ويّ النعاس
العركة خشنة الليل كله وما صفت
وجرحي صار بطول عمري ..
وصفنتي ويّ الليل ضدي اتحالفت ..
وبقت عيني مگابلتني گبالي وتباوع بعيني ..
وسلّمن شمسين لله وما غفت ..
ومن ذكرتك .. سكت كلشي
وعاند السكتة وبقى يصب الدمع
من ذكرتك مدري شنهي الصار بيّه
رفس گلبي وراد يشلعلي الضلع
وصحت .. شو محد سمعني
وللعلم لمن ذكرتك ﭼـان ليل
وصوت دخان الجگاير ينسمع ..
