غزل
مراقبة عام شباب الرافدين
امشي وياي ادَورك خاطر اندَلك
خلَك ما صرت لو ما خليلي تصير
و صرت خلي برضاتك چي صرت خلك
عَلمتَك عليَّ من الالف للياء ،
تغلط بالاجابة و اني اعدلك
و شلّي بغيرك انتَ ، و الگه مثلك وين ؟
تتعب تلگه غيري بهالتعب شلك
ياهو العَلمك و تريد تمشي بعيد
سل الشوگ خايف باچر يسلّك
مثل ضلك چنت ، بالخطوة نمشي ثنين
و مشيت انتَ بضلام و ضيعت ضلك
دليني عليك سنين تايه بيك
امشي وياي ادورك خاطر اندلك
عرفنّي إعله شخصك ، رايد احچي وياك
بس كلمه و بعد ما غيرها نگلك
وحده من الثنين ، و وحده راح اختار
" لو كلك احبك ، لو احب كلك "
إسأل ليش احبك ؟ حتى اكلك ليش
و ليش شما تسوي وياي اقبَلك ؟
لحضة موت عمري سنيني كلهن خوف
بس وياك اأمن لَمن اوصلك
و انتَ اخر نفس و شگد عزيز تصير
و بلحضة الموت تريدنه نملَك ؟
خيط إعله الجرح باللحم صرت وياي
لو كل الجروح تطيب ما فلك
تعرف كلشي بيه و ماعرفت شبيك
لغز ! حلّك لغز من يگدر يحلك ؟
و اشرد حتى اجيك ، و مدري ليش الخوف !
خاف تخاف مني بسدك اختلك
مثل ضلك اضل و الليل يگضي الليل
من تطلع شَمس من طولك انزلك .
ــ جبار رشيد
